Hapet Ambasada e SHBA-ve në Prishtinë

Zyra e Shteteve të Bashkuara në Prishtinë të martën është shndërruar në Ambasadë të Shteteve të Bashkuara. Kjo ngjarje është shënuar me një ceremoni të rastit, ku kanë marrë pjesë edhe udhëheqës të lartë kosovarë.
E ngarkuara me punë në ambasadën e porsahapur në Prishtinë, Tina Kaidanow, tha se gjersa Zyra e SHBA-ve në Prishtinë ka funksionuar për shumë vite me të gjitha përgjegjësitë dhe detyrat e një misioni të zellshëm diplomatik, emërimi si ambasadë pasqyron një fazë të re në zhvillimin tonë dhe nënvizon përkushtimin tonë të thellë dhe të qëndrueshëm për të punuar për përparimin e Kosovës dhe popullit të saj.

"Jam shumë krenare me atë që ky Mision ka arritur gjatë këtyre viteve, dhe jam posaçërisht krenare me punën e madhe dhe përkushtimin e stafit tim, si amerikan ashtu edhe vendor", vlerësoi Kaidanow duke përcjell njëkohësisht përshëndetjet personale të sekretares së Shtetit, Condoleeza Rice.

Presidenti i Republikës së Kosovës, Fatmir Sejdiu ndërkaq, me këtë rast ka thënë se Kosova ka tashmë një histori të marrëdhënieve speciale me Shtetet e Bashkuara të Amerikës që janë farkuar nëpër kohë të stuhishme të ekzistencës sonë.

Sejdiu e ka cilësuar hapjen e Ambasadës amerikane si “hap historik të institucionalizimit diplomatik të lidhjeve në mes të dy vendeve tona që i ndajnë kontinentet, po i bashkojnë vlerat e lirisë e të demokracisë”.

Kryeministri Hashim Thaçi ndërkaq e ka cilësuar si ditë të veçantë hapjen e Ambasadës amerikane në Prishtinë. "Dita e sotme është e veçantë për ne sepse miku ynë i madh, SHBA-të po avancojnë statusin e pranisë së tyre në shtetin tonë të ri. Por, dita e sotme nuk ka të bëjë vetëm me ndryshimin e këtij statusi, simbolika e kësaj ngjarje është evidente dhe historike", u shpreh Thaçi.

Që prej shpalljes së pavarësisë së Kosovës më 17 shkurt të këtij viti, në Prishtinë janë hapur Ambasadat e Shqipërisë, Britanisë së Madhe, Gjermanisë dhe Zvicrës.